تعرفى على فوائد البقدونس للبشرة والشعر
فضائح الخطوبة «أونلاين».. قصة إيناس الأبرز: «بيقولي كريب يعني إيه؟»
الخميس 25/فبراير/2021 - 12:26 ص
ميادة فتحي
مواقف مُحرجة عديدة تتعرض لها الفتيات خاصة في فترة «الخطوبة»، لكن بعضها يكون طريفًا، ما دفع فتاة تُدعى «مروة.ع»، لطرح موضوع للنقاش على أحد جروبات البنات، قائلة: «إحكيلنا موقف مُحرج مع خطيبك»، لتنهال عليها آلاف التعليقات، لفتيات يروين مواقف مُحرجة تعرضن لها مع الحبيب، ليُعد يومًا من عمرها من الصعب نسيانه كلما تتذكره تدخل في نوبات من الضحكات الهستيرية.
وقالت «إيناس. ن»، فتاة عشرينية: «كنت مع خطيبي في مطعم مرة، وبعدين قالي هتطلبي إيه قلت له هآكل "كريب"، وكان الشيف واقف علشان نطلب الكل، وفجأة قدام الشيف خطيبي قالي يعني إيه كريب؟، فاتحرجت والراجل لما حس بإحراجي قال: طيب أنا هشوف الترابيزة التانية وهجيلكم».
وأضافت: «بدأت أشرح لخطيبي أن التصرفات دي متنفعش قدام الناس، وقلت له أن الكريب ده سندوتشات وطعمها حلو جدًا هتنبسط منها بس مكنش ينفع تحرجني قدام الراجل، وحسيت إن خطيبي زعل بس الموضوع عدى وكل لما بفتكر الموضوع ده بقعد أضحك».
بينما روت « ليلى.ك»، مواقف كثيرة محرجة مع خطيبها: «أنا من أرياف وخطيبي من المدينة، ودايمًا بيحرجني مثلًا لو سألني على حاجة وأنا معرفتهاش، يعني مرة بيقولي أنا هشرب بريل تشربي معايا، قولتله: لا دا بريل من اللي بيتغسل بيه المواعين؟، قالي اسكتي ياجاهلة دا بريل بينضف المعدة من الميكروبات قولتله لا أشرب أنتَ».
أضافت "ليلى"، «كنا في مرة بنشتري أحذية فدخلنا محل رجالي، فلقيت خطيبي بيقول للبائع عاوز اسكيتشر، فسألته يعني أيه رد عليا قدام الناس قالي أصلك جاية من الريف متعرفيش غير الجزمة والبلارينا، الاسكيتشر دا نوع من أنواع الكوتشيات، اتحرجت جدًا أنه بيتعمد يحطني في مواقف محرجة ويستغل طيبتي وفطرتي قدام الناس».
بينما حكت« منال.ع»، فتاة عن موقف مُحرج تعرضت له وهي مع خطيبها، قائلة: «كعب جزمتي اتكسر وإحنا في الشارع وبعدين رايحة اسند عليه فحضنته، وكان الموقف محرج جدًا وبعدها اختفيت وخطيبي قالي الموضوع عادي، وقتها سندني وقعدني على الرصيف ووقف تاكسي وخدني عن أقرب واحد بيصلح جزم، وصلحت الكعب وقولتله عاوزة أرجع البيت».
