الجمعة 29 مارس 2024 الموافق 19 رمضان 1445
رئيس مجلس الإدارة
خالد جودة
ads
رئيس مجلس الاداره
خالد جوده

محمد عبدالله يكتب: حكايات أمي.."شعرة من دقن الأسد"

الخميس 23/سبتمبر/2021 - 01:42 م
هير نيوز


كانت أمي رحمها الله  سيدة من طراز فريد ..فهي لم تكمل تعليمها ولكنها كانت على قدر واسع من الثقافة يبدأ من الاقتصاد والسياسة وينتهي بالآداب والفنون وحتى الفلسفة.. فقد كان  الراديو هو مصدر ثقافتها بالإضافة إلى ما تيسر من قراءة للصحف كانت تقوم بها بنفسها.

كانت أمي شديدة الارتباط بالبرنامج العام وخاصة برنامج" إلى ربات البيوت" الذي كانت تقدمة الإذاعية القديرة الراحلة  صفية المهندس.. وكنت  أراها وأنا صغير تجمع سيدات الشارع وأصدقاءها في المنطقة الشعبية التي عشت سنوات عمري فيها  لتحكي لهم ماقالتة صفية المهندس وكيفية حلها للمشاكل التي يرسلها لها المستمعون.

كان منزلنا تجمعا نسويا مبهجا يبدأ عقب نزول أبي إلى العمل في السادسة صباحا ..يبدأ بجولة التسوق والعودة للتجهيز الجماعي للخضار وتنظيفه وتقطيعه أو تنقية الأرز أو حتى تنظيف الأسماك في بيتنا، لتتجه كل سيدة إلى منزلها لطبخه قبل أن يعود الأزواج .

كانت فترة الإعداد تستغرق بضع ساعات تقضيها النسوة في منزلنا لتحكي كل واحدة عن مشكلتها وتتولى أمي طرح الحلول بما منحها الله من حكمة فطرية .

كانت أمي تقول لي لاتدعو أن يرزقك الله المال لأن السفهاء يضيعون أموالهم.. ولكن اطلب أن يمنحك الله الحكمة فهي تاج علي رأس من يمنحة الله إياه .

وعلى الرغم من أن تعليمها لم يتجاوز الإعدادية القديمة  إلا أن حكمتها كانت تنعكس على كثير من رؤيتي للحياة .

في أحد الأيام حضرت إلى منزلنا إحدى الجارات تشكو من زوجها وتخبرها أنها لم تعد تطيق الحياة معه.

فقالت أمي لها كيف تريدين أن تتركي منزلك.. إنتي ماسمعتيش حكاية شعرة من دقن الأسد؟

قالت جارتنا.. أسد إيه.. ياستي أنا جاية اشتكيلك تقوليلي أسد!!

نظرت لها أمي وهي تبتسم.. اسمعي الحكاية وبعدين احكمي

صلي على النبي ... اللهم صلي عليك يانبي

شوفي ياستي ..

كان فية واحده في قرية دايما زعلانه مع جوزها ودايما سايبه بيتها وفي يوم قالولها الحل عند الشيخ سعيد ..ده راجل مبروك ويعملك عمل يخلي جوزك يحبك .

راحت الست للشيخ سعيد وهي عاملاله المحمر والمشمر .

سألها الشيخ سعيد إيه شكوتك يا اللي زعلانة من جوزك

ردت وهي بتزعق ..كراماتك ياشيخ سعيد عرفت إزاي إني زعلانة من جوزي ؟؟!!

قالها أومال شيخ إزاي؟؟

قالتله أنا زهقت  جوزي موش بيحبني وبيبص للستات وعايزة جوزي يحبني اعمل ايه؟؟

قالها الشيخ سعيد أنا مش هاقدر أعمل العمل إلا لما تجيبيلي شعرة من دقن الأسد

الست صوتت يالهوي أسد وشعرة من دقنة إزاي؟؟

الشيخ سعيد قالها ده شرطي علشان العمل ينفع .

راحت الست تفكر تعمل إيه ؟؟

وتاني يوم أهل البلد قالولها إن فية أسد على الجبل برة القرية بس ده أسد جعان ومفترس وبياكل أي حد يقرب منه.

الست دبحت كام فرخة وبطة وحطتهم في صينية وطلعت على الجبل وأول الأسد ما شافها زمجر وخرج سنانه الكبيرة

الست خافت بس افتكرت كلمة الشيخ سعيد "شعرة من دقن الأسد"

الست قربت منه وسابت الفراخ والبط وبعدت شوية ..الأسد أكل وبقي مبسوط  .

تاني يوم أخدت وزة كبيرة ودبحتها وراحت بيها للأسد ولما أكلها قربت منة وملست على شعرة

تالت يوم أخدت معزة ودبحتها وقدمتها للأسد ..أكلها وبقى مبسوط قوي  .

والست راحت تملس على شعرة وتمسك دماغه ..وهو منسجم قوي شدت شعرة من دقنه...وراحت جري للشيخ سعيد وهي فرحانة ومزقططة ..وهي بتقولة ياعم الشيخ سعيد ياعم الشيخ سعيد أنا جبت شعرة من دقن الأسد ..يالا إعملي العمل بقى.

بص الشيخ سعيد ليها وقالها.. يابنتي.. الست اللي تقدر تروض الأسد وتجيب شعرة من دقنة هتغلب في حتة راجل.. روحي شوفي إنتي مزعلة جوزك في إيه؟؟ واداها شوية ريحة "عطر".. وقالها انتي تصلي صلاتك وتاخدي حمام وتحطي من الريحة دي أول جوزك ما ييجي كل يوم لمدة شهر.. وبعدها تيجيلي تاني.

وبعد شهر رجعت الست ومعاها جوزها للشيخ سعيد وشكروه.

"شعرة من دقن الأسد".. ليست مجرد حكاية من حكايات أمي ولكنها إحدى تجارب الحياة العملية... وإلى حكاية أخرى. 



ads