كيف أتعامل مع زوجة أخي اللئيمة؟

روت فتاة مشكلتها عبر حساباتها على مواقع التواصل الاجتماعي، وطلبت من متابعيها ردودا وحلولا لها، لتفادي ما حدث معها واستقرار حياتها.

وقالت الفتاة في شكواهها:

السلام عليكم كيف أتعامل مع زوجة أخي اللئيمة عندي مشكلة وهي انا عايشة في بيت أخوي وزوجة اخوي ماذيتنا في حياتنا تتحكم بكل شيء وتأذينا بأسلوبها وكلامها وصراخها كل الوقت لدرجة انا ما تحملت هالشيء وقاطعتها مرات تكون هي غلطانة وتصارخ وترمي الاشياء فصارت تأذينا وقدام اخوي تسوي نفسها بريئة وتجيب لنا هدايا وتسولف واذا غاب أخوي لفترة أو سافر لدوامه ترجع تأذينا ويطلع لها وجه ثاني.

كلمت اهلي يقولون تحملي وعشان اخوك وعشان امك بس ما عاد اقدر اكذب واجامل ولا اقدر اكون مثلها وانزل لمستواها فقاطعتها واذا كانت موجودة بالجلسة اقوم منها ولا عاد كلمتها ابد عشان انهي المشاكل اللي تحاول تسويها لنا لدرجة ان كل يوم مشكلة وكل ما تكلمنا معها صارت مشكلة من شيء تافه المهم انا قاطعتها عشان اقلل تواصل ومشاكل ما ابي مشاكل البيت ما عاد فيه راحة ولا سكون منها راحت لاخوي وقالت له اختك ما تكلمني واذا جيت تقوم وبعدها راحت لكل اهلي وقالت نفس الكلام وسوت نفسها مظلومة عندهم وصاروا اهلي يضغطون علي بسببها وكأني انا الغلطانة وانا كنت احاول ابعد شرها عني

وزاد الموضوع وصار ضدي وصرت احس بالذنب لاني سويت الشي الصح يوم اكلمها يجيني اذى منها ومن اسلوبها اللي كله صراخ واذى وبدون حق ويوم قطعتها جاني اذى منها والحين اهلي زعلانين لاني قطعتها طيب وهي والاذى اللي منها ليش تسكتون ماادري ايش الحل الحين انا بكل الاحوال ما ارتحت واحس اني مسوية شي غلط مع انها هي الغلطانة علي وانا ما اعلم اخوي بافعالها عشان ما تزيد المشاكل وعشان ما ابي افرق بينهم او يكون هالشيء بسببي واهلي نفس تفكيري وهو ما يبي يتدخل اصلا بالمشاكل ولا هو شايفها لانها قدامه تصير وحدة ثانية ايش الحل معها

ادري شخصية اهلي ضعيفة وما يبون يردون عليها وحنا مانقدر ننتقل لمكان ثاني وانا قاطعتها من اذاها وللحين اتأذى لانها مسوية مظلومة عند اهلي واخوي والكل صاير يهاجمني ويحسسوني بالذنب وانه ما يجوز واصلا مايجوز افعالها واذاها وانا ماسويت لها شي حتى مارديت عليها بس قطعتها من كثر الاذى وربي يشهد علي للحين اذاها جايني حتى وانا مقاطعتها

ابي حل لهذا الموضوع يكون حل صحيح وحلال ويرضي ربي مستحيل ارجع اكلمها لانها تأذيني وتتدخل بكل شي وانا ماابي هالشي وانا مقاطعتها حالياَ واحس بضيق وزعل لأن اهلي مو راضيين عني مع انهم شايفين افعالها ايش الحل.

وجاءت الردود عليها كالتالي..

واضح انها مضايقه من وجودك بالبيت لكن لا تسمحي لها ياظهارك بمظر الشخص السيء.

السلام عليكم يا ابنتي.  انصحك بالدعاء لله تعالى أن يفرج همك ويرزقك الزوج الصالح ويكون لك بيتك وعالمك وتنتقلي إلى منزل زوجك بإذن الله. نعم اكثري من الدعاء . وفي الوقت الحالي أنت يجب أن تكوني ذكية وأن لا تقاطعيها بل قللي من الاحتكاك. المقاطعة لها خطأ لأنك أنت عندها وفي بيتها ومن العيب مقاطعتها ولكن من الأفضل أن تقللي الاحتكاك. بما أنكم مجبورين على السكن أنت وامك في بيت أخوك فمن الأفضل تطبيق المثل القديم الذي يقول (دارهم ما دمت في دارهم) والمثل يعني سايسهم، لاطفهم، وتجنب الصدام معهم.

استهدي بالله وبطلي حساسسيه ليش القطيعه انت اعقل من ذلك ارجعي الى رشدك وعقلك يبدو انك تتمتعين بحس عالي من الذكاء استخدميه بحكمه وخلي الكل راضي عنك.

كوني خبيثة مثلها واضح انك طيبة وواضحه وهذا لا يمكن ان يكون التصرف المناسب مع انسانه مثلها فيجب عليك ان تغيري من طريقتك وان تكوني مثلها وان تقلبي الجميع عليها لكي تتوقف عن ما تفعل وتبتعد عن طريقك.

يجب ان تتعلمي كيف لا تعبري عن مشاعرك بشكل كامل حاولي ان تتعاملي معها وان لا تظهري مشاعرك الحقيقية حاولي ان تتعاملي معها كانه لا يوجد بينكما مشاكل واحتفظي بمشاعرك وطاقتك ففي النهاية هي شخص غير مهم في حياتك وتجاهله افضل لك والتجاهل يكون بالتعامل لكن بدون مشاعر التعامل بدون رغبه