رفيدة المدني تكتب: مش هستنى لما أكبر

دايمًا بنسمع كلمة استني لما تكبري.... انتي لسة صغيرة

بكرة تحققي كل أحلامك

ليه دايمًا بنربط الحلم بالعمر

مين قال إني مينفعنيش أحقق أحلامي ويبقى عندي طموح

وهدف عايزة أوصله وأنا لسة صغيرة.

أنا رفيدة المدني عمري 12 سنة. أصغر مذيعة في مصر حاورت مشاهير الإعلام ومسؤولين كبار من وأنا عمري 10 سنين.

حاورت د أشرف صبحي وزير الشباب والرياضة في الملتقى الإعلامي الأول لجيل النشء

حاورت د هشام عزمي الأمين العام للمجلس الأعلى للثقافة على قناه dmc

حاورت مشاهير الإعلام 

الإذاعية القديرة أستاذة إيناس جوهر

الفنانة صفاء أبو السعود

الصحفي والإعلامي جمال عنايت

الإعلاميه دعاء عامر

الإعلاميه ياسمين نور الدين

كنت أول طفلة مذيعة تحاور مسئول على الهواء مباشرة على قناه dmc عن مبادرة أطفال وكبار بلا مأوى

 اتكرمت في منتدى المرأة المصرية كأصغر مذيعة في مصر وأصغر ملهمة للتحدي والإصرار

كنت من الـ10 فائزات في مبادرة (واحدة جديدة) عن قصتي (حلمي ونفسي يتحقق) من وزيرة التضامن الاجتماعي دكتوره نيفين القباج ومن الفنانة ليلى علوي والفنانة يسرا والإعلامية منى الشاذلي والكاتب أحمد مراد

ليه منعبرش إحنا عن أحلامنا ونتكلم عن مشاكلنا؟؟

ومن هنا بدأ الحلم والفكرة

حلمي أكون أصغر مذيعة في مصر تقدم أول برنامج توك شو يتكلم عن مشاكل الأطفال وأحلامهم

إحنا نتكلم عن نفسنا والكبار يتكلموا معانا مش عننا

بدأت من عمر 8 سنين تواصلت مع شركة إنتاج وبدأت التنفيذ

صورت تقارير في مختلف محافظات مصر عن أحلام الأطفال ومشاكلهم

وجهزت برنامج كامل

لكن للأسف لقيت كلمة مستحيل هي الرد

مستحيل قناة كبيرة تقبل فكرة المذيع الصغير... مين مسئول يوافق طفل مذيع مذيع يحاوره

مين إعلامي شهير يوافق طفل يحاوره... مستحيل دا يحصل

لكن أنا كسرت كلمة مستحيل

وأول قناة أظهر فيها كطفلة مذيعة كانت dmc

ووافق وزير ومسئولون كبار إني أحاورهم عننا وعن أحلامنا ويا ترى هما شايفينا إزاي 

وكمان مشاهير الإعلام وافقوا ورحبوا بفكره الحوار معاهم

كحوار بين جيلين

يربط جيلنا بجيل قدوة نتمنى نكون في يوم زيهم

ولسة بحلم ونفسي أحقق أحلام كتير

لسة مقدمتيش أول برنامج توك شو الأطفال.. لسة مفيش قناة تلفزيونية خاصة بينا..

بحلم أحاور فخامة الرئيس عبدالفتاح السيسي

وأكون أصغر مذيعة في مصر تحاور الرئيس

أسجل في موسوعة غينيس كأصغر مذيعة تحاور فخامة الرئيس ووزراء ومسئولين كبارًا

أكون سفيرة الأطفال في مصر

أتكلم وأعبر عن أطفال مصر نعبر عن أحلامنا ونتكلم عن مشاكلنا

ويا رب حلمي يتحقق.