نهى أباظة: تكتب متعادة وملهاش عادة

متعادة كاش أو فكة.. متعادة بدبوس ومعاه شكة.. والتكة بتيجي وراها تكة وملهاش مالكة

متعاده.. وملهاش عادة

متعادة بتاريخ هجري وميلادي.. ومناسبة والتانية عادي.. وللذكرى كام صورة ومنظر.. ناس تتدارى وناس تتمنظر 

واللي يفلتر فيها كسبان 

متعادة وملهاش عادة

متعادة بنفس التفاصيل.. متعادة من غير موازين..

بشبع أو جوع.. متعادة بنفس الموضوع.. حوارات متعاده.. حركات كيادة.. والقهوة اللي فاكرها مظبوط.. مظبوطة بطعم السادة

متعادة وملهاش عادة

متعادة بيومها اللي يعدي ومشاكلها اللي بقول مش أدي..

ناس ومشاكل.. عمالة تتشاكل.. واللي غاب.. هو اللي عاب..

السكر ملح.. وياريت كان داب  

متعادة وملهاش عادة

متعادة ساعات ودقايق.. يوم ماشي فيها.. ويوم سايق.. الخايب كان فيها فايق.. والشاطر ملهوش أمان..

متعادة بنفس المكان..

شوية يمين وشوية شمال.. ولافيش نار من غير دخان..

متعادة وملهاش عادة

متعادة باللي يطبلي حسب السيرة.. ومتعادة باللي يسلمني صيدة كبيرة

متعادة بفرح وهم.. متعادة وناسها بتتلم.. لما يكون فيه تورتة كبيرة..

متعادة.. وملهاش عادة

متعادة بماتش وحكام.. متعادة حتدفع كام.. وعلى كل لون.. بييجي الجون 

 والوش في الوش.. متعادة ومفيهاش معلش.. واللي بناله قصر معلم..

بس نفسه يبات في العش 

متعادة وملهاش عادة

متعادة وملهاش عادة.. مريض نفسي فتحله عيادة.. العاقل فيها محبوس.. والمجنون خرج بشهادة

متعادة وملهاش عادة