9 معلومات عن بول أوستر «عميد ما بعد الحداثة الأمريكية»
هلا رشدي تروي موقفًا مع نجلها وتنصح متابعيها: «التربية محتاجة هدوء أعصاب»
الأحد 13/نوفمبر/2022 - 07:04 م
هلا رشدي
بسمة خالد
كشفت الفنانة هلا رشدي عن موقف جمعها بنجلها "معز"، أوضحت من خلاله أسس التربية الصحيحة للأطفال وذلك عبر حسابها الرسمي على موقع التواصل الاجتماعي "فيس بوك".
وكتبت هلا رشدي في منشورها: "معز امبارح واحنا مروَّحين من بيت صاحبتي، حصل موقف فـ فِضِل يزعق ويتنرفز قدام صاحبتي وولادها، ولأاا بِـ عِلو صوته، وانا أبصله ومحترماه قدامهم وبرد عليه بكل هدوء، وهوه مكمِّل.. خرجنا من بيتها وعينه ومشيتُه كلها علامات انتصار إنه عمل فيها بلطجي وزعق وأنا سكت.. مع إن في الآخر كلامي هو اللي اتنفذ، لكن الاحساس واضح إنه كان حلو".
واسترسلت كلامها: "أول ما ركبنا العربية قولتله بكل هدوء: بص يا معز، لو على الزعيق يا حبيبي.. فأنا ممكن وبصوت مشجع في آخر الاستاد عايز يسمع صوته لـ اللعيبه أزعق.. فضل باصصلي وهو مرعوب وبيعيط، كان صعبان عليا جدًا وقلبي واجعني، بعدها رجعت بصوت هادي تاني وقولتله: شفت إنت خوفت ازاي؟ اللي بيزعق بيبقى عامل زي الوحش فبيبقى مخيف، فالناس بتسمع كلامه مش عشان مقتنعه بيه أو بتحترمه، لأ..عشان خايفين منه..تحب تعيش مخيف ولسانك سابق دماغك، ولَّا راجل محترم بيفكر بعقله ويتناقش ويوصل لحل وسط بكل هدوء، وتجبر اللي قدامك يحترمك ويحبك؟؟ سِكت".
وتابعت حديثها "مسحت دموعه، وأخدته في حضني وشغلتله الاغاني اللي بيحبها وهزرنا ولعبنا وباقي اليوم مر بسلام".
واختتمت الفنانة هلا رشدي كلامها: "التربية صعبة ومحتاجه هدوء أعصاب، عشان بتوفيق الله يكبر سليم النفس معافى، وذكرياته كلها حكايات يفضل يتعلِّم منها ويحكيها وابتسامته على وشه، وبعد ما نمشي يترحم علينا ويفضل فاكرنا بالخير بس".
آخر أعمال هلا رشدي
وفي سياق آخر، يذكر أن آخر أعمال هلا رشدي، مشاركتها في مسلسل "مكتوب عليا"، إلى جانب كل من النجوم أكرم حسني وأيتن عامر، وهنادي مهنا، والتي دارت قصته حول "جلجل" الذي يستيقظ فيجد كلمات على يده لا يراه إلا هو وتتوالى الأحداث في ذلك السياق.
