بقلم آية شعراوي: نحترم حزن بعض شوية

ياريت نحترم حزن بعض.. للأسف معندناش ثقافة التعامل مع حزن الغير، دائما عندنا تعليقات على طريقة حزن اللي قدامنا، لو حد طَول في حزنه على شيء أو شخص بزياده بنبتدي اللوم عليه سواء بنقوله في وشه أو من وراه إيه ده أنت مش مؤمن ولا إيه؟! هو محدش حصله كده غيرك؟! احمد ربنا غيرك خسر أكتر؟.

 دا ولا كان فارقلك ويبتدي اللي حواليك يستغربك ويسقط عليك صفات سيئه زي مثلا بياع ..ملكش غالي ..متبلد المشاعر.

 يعني طولت في حزنك هننقدك تخطيته هننقدك بردو.

 

هتروح وتيجي بين الحزن والتخطي هنقول عليك متخبط مش هنغلب

 

السؤال بقي ..

 ليه مبنحطش في اعتبارنا ان استقبال كل واحد للصدمه مش زي التاني ليه مبنحترمش اللي عايز يحزن وياخد وقته ما يمكن دي طريقته في التعافي بياخد وقته ويفوق ! ويمكن قدرته وطيبة قلبه اضعف من انها تستحمل اللي حصل ،، وليه بنستغرب من اللي بيقوم ويقف علي رجله بسرعه ؟! ما جايز كتر الصدمات اللي عدت عليه قوته او يمكن معندوش رفاهيه الانهيار اصلا  عنده هم ومسؤليه كبيره لو حزن ووقع محدش هيقف ويسنده غير نفسه .

 واللي بيروح ويجي بين الاتنين دا اكيد بيحاول يفوق ويسند نفسه بس للاسف كل شويه بينتكس .

 ماتزودوهاش علي بعض ولا تعلو علي حد في طريقة حزنه ولا تلومه علي فتره "ما بعد الحزن " ،لو مش قادر تساعده علي الاقل ادعيله ان ربنا يعديه من المحنه اللي هو فيها وهو بكامل عقله وقلبه واحساسه وسيبه يطلع حزنه بالطريقه اللي تريحه .