بسبب معاناة الأمهات والزوج الحنين| «الهرشة السابعة» يثير الجدل بين النساء

أثار مسلسل "الهرشة السابعة" بطولة الفنانة أمينة خليل، جدلا واسعا بين النساء على مواقع التواصل الاجتماعي، حيث وصفته الكثير من الأمهات بأنه واقعي يعبر عن حال كل أم تعاني وتتحمل الكثير من أجل أبنائها، كما رآته الكثير من الفتيات نموذج يحتذى به عند اختيار الزوج الحنون.

وانتشرت الكثير من المقاطع من مشاهد المسلسل على السوشيال ميديا مع تعليقات البعض أنه أفضل مسلسل لهذا العام في شهر رمضان.

وكتبت منار أيمن في منشور: «مسلسل "الهرشة السابعة" جماله كله ف إنه حقيقي! في قصة آدم ونادين بيعرض مواقف حقيقية وشبه اللي بتحصل في كل بيت ودا مايخوفش، دا المفروض يوعي الجواز كله مراحل لازم نعدي بيها مش كله وردي ولا كله مشاكل ومسئوليات. أكيد بيحصل ملل بعد الجواز.. بسبب روتين الحياة المستمر بس الحب دايما بيلحقهم. والخلفة طبيعي تأثر في الأول! فرد جديد بمسئوليات جديدة .. الأم بتتضغط وبتتعب..بتعيط كتير من خوفها .. والحياة بالنسبالها بتتغير .. بيحصل خناقات وبيحصل اختلافات وبيحصل زنقة فلوس.. بس اللي بيعدي ده كله إيه؟ المشاركة.. والمساندة .. محدش فيهم لوحده.. مساعدة الزوج لزوجته .. الكلمة الحلوة منهم لبعض.. الحضن .. تقدير مجهود بعض .. وأهم حاجة الحنية والإحتواء كل المراحل الصعبة بتعدي لما يبقى معاكي شريك حياة حقيقي.».

كما كتبت إحدى الصفحات: «مسلسل الهرشة السابعة من اجمل مسلسلات رمضان الدرامية السنة دي ان لم يكن الافضل بلا منازع (أول ٤ حلقات) .. مسلسل راقي جدا، لا فيه زعيق ولا تبريق عيون ولا كليشيهات محفوظة ، مسلسل يغرد منفردا.. اتكلم عن ايه ولا ايه؟! عن جمال الصورة و لا عن قوة التمثيل ولا السيناريو القوي بتاع ورشة سرد بقياد مريم ناعوم ولا عن المخرج الكبير الموهوب كريم الشناوي. السيناريو مكتوب حلو اوي، معمول بحرفية عالية، متحسش بملل بالعكس انت مستمتع باي مشهد حتي لو المشهد صامت.. أداء الممثلين حلو او اوي خصوصا امينة خليل و محمد شاهين و محمد محمود.. كلهم متمكنين من ادواتهم وعايشين الادوار اللي بيأدوها وبيخلوك تصدقهم فعلا».

وتابع: «المسلسل الوحيد اللي يمكن جاب سيرة ان فيه ازمة اقتصادية مأثرة ع الكل لانه بيحكي عن الطبقة فوق المتوسطه وجايب ان دول برضه متأثرين بالازمة الاقتصاديه بشكل غير مباشر المسلسل الوحيد اللي من فتره كبيرة جايب العلاقات بين الازواج طبيعية وفيها حب وتألف وبعض من المشاكل والزوج والزوجة متفاهمين وبينهم مشاكل عادي لكن بيقدرو يحتوو بعض.. مش خيانه وغدر وزعيق و خناقات ويكرهوك ف الجواز، كريم الشناوي المخرج قادر انه يحول اي مشهد مكتوب ع الورق للوحة فنية، رسم المشاهد ب حركة الكاميرا دائما جميلة والكادرات غاية ف الجمال و بتغذي العين من جمالها.. كل مشهد معمول بعناية،الأهتمام بالتفاصيل عالي جدا، تسكين الادوار احترافي بجد».

وأضافت: «أدي المسلسل ده لاي مخرج تاني "بدون ذكر أسماء" هيطلعلك منتج مشوه زي مخرجين مسلسلات تانيه السنه دي مسلسل الهرشة السابعة اقدر اقول انه بيمثل الفن الحقيقي ف مصر».