نجوم مهرجان القاهرة السينمائي 2025 يكشفون آرائهم حول “الهدف من الزواج”

على السجادة الحمراء لحفل افتتاح مهرجان القاهرة السينمائي الدولي في دورته الـ46، كان السؤال الأبرز الذي طرحته المذيعة على نجوم الفن: “الناس بتتجوز ليه؟” — سؤال بسيط في ظاهره، لكنه فتح الباب أمام إجابات متباينة جمعت بين الطرافة والفلسفة والرؤية الواقعية.
 

أروى جودة: “عشان نلاقي حد نتخانق معاه” في مهرجان القاهرة 

بدأت أروى جودة إجابات النجوم في مهرجان القاهرة بخفة ظلها المعتادة، إذ قالت ممازحة: “الناس بتتجوز عشان تلاقي حد تتخانق معاه!”، ثم تابعت بابتسامة: “بس أكيد كمان عشان نلاقي رفيق الدرب والشخص اللي نكمل معاه حياتنا.”

أما أحمد مجدي فاختار زاوية مختلفة، إذ قدّم إجابة ذات طابع فلسفي قائلاً: “الناس بتتجوز أساسًا بسبب الضغط الاجتماعي، مش دايمًا عن اقتناع كامل.”

النجم الكبير حسين فهمي في مهرجان القاهرة أكّد أن الدافع الحقيقي وراء الزواج هو الحب، موضحًا: “الحب نمرة واحد في كل حاجة، لأنه بيضم الحنان والأمان، ومفيش حاجة تقدر تقف قدّام الحب.”

لبلبة: “الزواج حياة وأسرة وأطفال”

أما الفنانة لبلبة في مهرجان القاهرة فقد رأت أن الزواج هو لبنة الحياة الطبيعية، وقالت: “الناس بتتجوز عشان تكوّن أسرة وتخلف، دي الحياة. أنا بشجع كل الناس تتجوز وتخلف طفلين على الأقل، وكنت أتمنى يكون عندي 3 أولاد.”

بروحها المرحة، بدأت الفنانة إسعاد يونس إجابتها بإيماءة طريفة، ثم قالت: “زمان الناس كانت بتتجوز عشان بتحب بعض وعايزين يخلفوا، لكن دلوقتي الوضع اتغيّر.”

وأضافت في مهرجان القاهرة موضحة: “دلوقتي الناس بتحسبها كويس جدًا، لأن الزمن صعب، ومش كل الناس بقت عندها استعداد للحياة الزوجية الطويلة بالشكل القديم.”

أما التونسية درة، التي تحتفل بمرور خمس سنوات على زواجها في مهرجان القاهرة، فقد قدّمت تعريفها الخاص للزواج قائلة: “الناس بتتجوز عشان الونس، ده أهم حاجة. إن الزوجين يونسوا ببعض، ويكون بينهم أمان وسند وخوف على بعض.”، وأضافت: “الزواج الحقيقي مش بس لحظات حلوة وخروجات، لكنه كمان اللحظات الصعبة اللي بيقف فيها كل طرف جنب التاني.”

بينما تحوّل السؤال البسيط إلى مساحة تأملية مليئة بالمشاعر والصدق، عكست تنوع تجارب النجوم في مهرجان القاهرة السينمائي بين من يرى الزواج حبًا، ومن يراه مسؤولية أو شراكة إنسانية، ومن يتحدث عنه بخفة دم مصرية خالصة.