«أنا جزارة ومش بخجل».. مرسا ماكسيموس تحكي لـ "هير نيوز" كواليس دخولها عالم الجزارة
في عالم اعتاد أن يرى الجزارة مهنة رجالية خالصة، اختارت مرسا ماكسيموس أن تخوض التجربة من بابها الصعب، لتثبت أن النجاح لا يرتبط بنوع، بل بإصرار وتجربة وشغف حقيقي بالمهنة، وفي هذا الحوار مع منصة "هير نيوز" الإعلامية، تكشف لنا مرسا تفاصيل وكواليس مهنة الجزارة.
في البداية، عرفينا بنفسك؟
اسمي مرسا ماكسيموس عبد النور، عندي 29 سنة، أم لثلاثة أطفال. مواليد أسيوط، لكن مقيمة في القليوبية بمنطقة الخصوص.
كيف بدأتِ مشوارك المهني في مجال الجزارة؟
في البداية كنت بشتغل في الأكل البيتي، وبعدها اتجهت لمجال الجزارة عن طريق شريكي مصطفى وجاري، وهو أصغر مني بأربع سنين. ماكنتش أعرف أي حاجة عن المهنة خالص في الأول.
مين كان أكتر شخص داعم ليكي في البداية؟
والدي كان أكتر شخص دعمني. هو اللي شجعني لما مصطفى عرض عليّ فكرة الشغل في الجزارة، وخلاني أوافق وأدخل المجال.
كمان جوزي وأهلي وأهل جوزي كلهم كانوا داعمين، لكن الفضل الكبير يرجع لجاري مصطفى، لأنه هو اللي علمني المهنة وساعدني أبقى شاطرة فيها جدًا. وهو بالنسبة لي أخويا الصغير مش مجرد جار وشريك بس.
إزاي كانت البداية داخل المهنة؟
سبت شغل الأكل البيتي، وكنت في الأول بعمل كفتة وحواوشي وحاجات بسيطة، وكنت باخد اللحمة من جاري وشريكي حاليا مصطفى. بعد كده بدأت أشتغل معاه فعليًا، لكن ماكنتش فاهمة أي حاجة في الأول، واتخدعت كذا مرة لحد ما اتعلمت.
إيه اللي اتعلمتيه في المهنة مع الوقت؟
اتعلمت أقطع وأبيع، واتعلمت كل القطعيات واستخداماتها، وبقيت أعرف كل قطعة لحمة بتنفع في إيه، حتى لما بتتطبخ بقدر أعرف نوعها. كمان اتعلمت الذبح وذبحت كتير، وعندي فيديو ذبح وصل لـ13 مليون مشاهدة عبر السوشيال.
إيه رد فعل الناس في البداية؟
في الأول الناس ماكنتش متقبلة الفكرة، وكانوا بيتفاجئوا إني ست شغالة في الجزارة. لكن ده كان من حوالي 4 سنين، ودلوقتي بقيت معروفة في المنطقة وعلى السوشيال ميديا.
هل واجهتي تعليقات سلبية؟
أغلب التعليقات مش سلبية، لكن في أسئلة بتتكرر بسبب إني مسيحية، هل بيتم التسمية ولا لأ. وده طبيعي إن الناس تسأل. لكن الحقيقة إن الذبح بيتم باسم الله على الشرعية الإسلامية، زي أي جزار في مصر.
هل المهنة متعبة بالنسبة لكِ؟
أنا مش بشوفها متعبة لأنّي بحبها. لكن وقت المواسم بيكون فيه ضغط كبير جدًا، ساعات بننام 2 الفجر ونصحى 6 الصبح ونكمل شغل.
إمتى حسيتي إنك نجحتي؟
لما لقيت إقبال كبير من الزباين، وتعليقات إيجابية، وبقي عندي زباين ثابتين بييجوا مخصوص، وبيجيبوا أهلهم كمان. حسيت وقتها إنّي سيبت بصمة في المهنة.
هل واجهتي رفض من الزبائن بسبب كونك ست؟
خالص، بالعكس كل الناس بتتعامل باحترام وتشجيع، ومفيش أي مشاكل في التعامل.
إيه الرسالة اللي حابة توجهيها للبنات؟
ما فيش حاجة اسمها “كسوف” طالما الشغل حلال ومحترم. أهم حاجة إن الإنسان يشتغل ويكسب قرش حلال، ومفيش أي مهنة عيب.
