تايلور سويفت تسخر من عشاقها القدامى في ألبومها الجديد
حلا شيحة: أبويا كذاب ومعز حبيبي وزوجي
الأحد 18/يوليه/2021 - 12:21 م
قالت حلا شيحة، إنها مصدومة من كلام والدها عن زوجها الذي تزوجته بكامل إرادتها، جاء ذلك في أول رد فعل لها، حول تصريحات والدها الأخيرة في برنامج الحكاية.
وأضافت، "الحمد لله لقيت مع معز كل المعاني الجميلة من احترام ورجولة وشهامة نادرة الأيام ديه وانا لم يخطفني أحد كما قال والدي، والكلام ده لا يصح أبدًا، أنا بحب زوجي وسعيدة معاه وسعيدة بحبه ليا وبنحترم بعض ومعز بيحترم رأيي وبيقدر مشاعري".
وتابعت، "وبالعكس هو دائمًا بيهديني وطبعًا بيساندني ويشجعني لأني زوجته وحبيبته وهو أكبر بكتير من الكلام اللي بيتقال عليه وافتراءات مش صحيحة وهو أبعد ما يكون عنها".
معز له رؤيته الواضحة في الدين
وأضافت: "ولن أسمح لأحد بالكلام عنه بأي صوره خاطئة بأي شكل من الأشكال، معز طول عمره له رؤيته الواضحة في الدين وحتى في الفن، وهو ليس مع أي جماعة أو فئة معينة، هو يمثل نفسه وله أفكاره وآراؤه العلمية والدينية المختلفة الجميلة، وليس لأحد أن يصنفه أو يضعه في أي قالب فقط لأن هواه لا يوافق ما يمثله معز، هو في إيه في بلدنا الأيام ديه بنحارب ونضارب في بعض وعايشين في قصص وهمية من نسج خيالنا عن بعض".
وتابعت: "هو خلاص أي حد يتكلم بلغة الدين لازم يبقى متطرف أو إخواني؟ هو مبقاش في مسلمين وسطيين طبيعين؟ هو ليه كل أنواع الهجوم ده على أي حد؟ أنا زعلانة من والدي جدًّا لأنه يعرف معز كويس جدًّا وقعدوا مع بعض كتير والدي بيحبه جدًّا وشاف منه كل خير".
واستطردت، "معز زيي اتجوز ١٤ سنة من عمره وكان مستقر في حياته وعنده ٣ أولاد ربنا يخلهومله وعمره ما كان بتاع ستات زي ما بيتقال، كلام لا يليق أبدًا وفي الآخر زيي لم يكمل جوازه وحدث الطلاق وكلنا معرضين لده، وطبيعي إنه يحاول زي أي راجل محترم يلاقي الاستقرار في حياته في الحلال، ومتوفقش أكتر من مرة، وديه مش حاجة تعيب أي حد والحمد لله اتقابلنا وقربنا من بعض، لأن ظروفنا متشابهة وعندي أولاد مثله وأولادنا شبه بعض الحمد لله، واستقرينا احنا الاتنين، إيه ده يزعل الناس بدل ما ندعى لبعض بالخير بقينا نتصيد لبعض ونخوض في أعراض بعض...
في الآخر بوجه كلمة لوالدي الحبيب إنه لا يصح أبدًا كلامك مع كامل احترامي لك وللجميع".
