حكايات جروبات الماميز.. بين «ربّوا عيالكم» والتحذير من شغب الأولاد

أصبحت جروبات الأمهات على مواقع التواصل الاجتماعي أهم شيء تبحث عنه كل أم عند بداية العام الدراسي، فهي وسيلة للتواصل بين أولياء الأمور فيما بينهم، وأيضا مع المدرسين والمدرسات وأحيانا مدير المدرسة، ولذلك فهي تتيح مجال رحب وغني لمناقشة مشاكل الأطفال وحلها.

وتعتبر مشاكل تربية الأطفال أبرز ما تتحدث فيه الأمهات على جروبات الأطفال، حيث تحاول كل أم أن تحافظ على تربية طفلها وسلوكه وأخلاقه، كما تحاول توعية الأخريات بذلك.

وعلى سبيل المثال نشرت إحدى الأمهات مشكلتها على موقع التواصل الاجتماعي "فيس بوك"، قائلة: «نرجع نقول تانى كل واحدة تشد على عيالها واللى فاكرة ابنها ملاك ميطلعش منه كده والمدرسة كلها عيال متربية تفوق، علشان أنا اتصدمت من منظر عيل ميجيش سنة خامسة حتى ماسك ازازة كاسرها ورايح يهوش زميله بيها، وأنا فى إيدى البنات خفت عليهم، وقدام باب المدرسة مباشرة وأقوله بس اسكت أنا هروح اندهلك المدير يقولى اندهيله؟!! لا معلش اللى مش عارفة تربي ابنها تربيه علشان احنا عندنا عيال خايفين عليهم».

ونشرت أخرى منشور تناشد فيه المعلمات على جروبات الماميز، قائلة: «لكل المدرسات عارفة الولد اللي ساكت على طول بس عينيه على طول معاك ومتردد إنه يرفع إيده؟ طب عارفة البنت اللي تحسيها مش واثقة في نفسها بس نفسها تنطق وخايفة؟ ركزي معاهم الله يباركلك دول عيالنا برضوا بس الأولاد اللي صوتهم عالي ودمهم خفيف مغطيين عليهم، ماتيجوا نشوفهم ونكلمهم ونشجعهم ونقف جنبهم ونسمعهم عشان بيكون صوتهم واطي، ماتيجوا نختارهم في الإذاعات، هيعكوا الدنيا؟ طب ما يعكوها هو يعني خلاص هنموت لو العيل اتلخبط ؟ خليه يتلخبط ونصححله في الطابور من غير ما نتحرج ولا نوتره ونبتسم في وشه ونقوله إغلط عادي أنا هنا عشان أصححلك، حركة بسيطة منك ممكن تغير مسار حياة إنسان بدون مبالغة».

واستخدمت إحدى الأمهات أيضًا "جروب الماميز" للتوعية من أجل الحفاظ على الطلاب، وقالت: «أرجو منكم التنبيه على الأولاد أنهم يخرجوا من المدرسة يمشوا يروحوا على طول وعدم الوقوف أمام المدرسة إطلاقا، لأن الأولاد بيخرجوا يضربوا بعض برة أمام المدرسه وطبعا المدرسه ملهاش دعوه بالمشاكل دي، وأرجو التنبيه على الأولاد سنة خمسة وسادسة بلاش شغب الولاد بيتخنقوا كتير مع بعض وبيخرجوا يضربوا بعض بره، ولو صادف وولية أمر واقفه بره كمان ممكن تضرب الطالب اللي بيتخانق مع ابنها بدل ما تحل الموضوع بعقل لا تضربه، أرجوكم احنا مش ناقصين مصايب كل واحد ينبه على أولاده بلاش شغب ومشاكل ربنا يسترها على أولادنا جميعا وأشكركم جميعا».