بنات

«بنظبط القعدة في البلكونة».. أفكار البنات لقضاء الوقت مع خطيبك بزيارة البيت

السبت 15/يناير/2022 - 05:01 ص

ساندي جرجس

طرحت إحدى الفتيات سؤالًا على موقع التواصل الاجتماعي "فيس بوك"، لتحصل على خبرات الفتيات الأخريات حول ما يخص قضاء الوقت مع خطيبك عند زيارته لكِ في المنزل.

وقالت الفتاة في منشورها: «قولولي افكار بتعملوها مع خطيبك لما يجيلك زيارة في البيت؟»، وقدمت لها الفتيات في التعليقات أفكارًا مختلفة، ومنها:

بنعمل كيك مع بعض

علقت منى: «بنجيب لب أو شيكولاتات أو أي مشروبات وبنحب ندخل المطبخ مع بعض فممكن نتقابل بعد الشغل ونروح على البيت ماما تكون محضرالنا حاجة الأكل نقف نعمله وممكن نعمل كيكة أو أي حلويات علشان نحلي بعد الأكل ونتغدى ونحلي ونشغل فيلم نتفرج عليه أو نلعب أو نفضل نسكرول في موبايله ونتناقش في البوستات اللي بنشوفها وشوية ونقوم نعمل قهوة أو نسكافيه وممكن ماما تيجي تقعد معانا شوية نتكلم وخلاص».

ما بنلحقش نعمل حاجة

وقالت آلاء في تعليق آخر: «والله ما بنلحق نعمل حاجة بابا وماما واخواتي والعيله كلها بيحبوا يقعدوا معانا ويحكوا كلهم سوا وانا بتفرج».

اقرأ أيضًا..

«اتجوزي في بيت عيلة».. البنات يشجعن عودة العادات القديمة

تسلية وخلاص

وعلقت دينا: «مره قعدت ارسم وشه وأوقات كتير بندخل كلنا المطبخ نفتكس أي حاجة بنشوفها على اليوتيوب ونستناها تتعمل مع تيتا ومامتي واحنا بنتفرج على أي حاجة أو بننم على أي حد».

أهم حاجة تتكلموا كتير

وقالت منة: «اللي اعرفه انه بيقعد ساعتين تلاته بالكتير يتغدى ونحلى ونتكلم شويه ويمشى أكيد مش بيقضي يوم كامل عشان تلحقوا تتفرجوا على فيلم أو تلعبوا وكده سيبي الحاجات دي لبعد الجواز أهم حاجه في الخطوبه تتكلموا كتير وتعرفوا بعض كويس».

كانت حلوة أوي

وعلقت رحاب على المنشور وقالت: «كان لازم أجهز فيلم عشان نتفرج عليه سوا وجابلي لعبة لودو كانت لذيذه بردو أوي وأوقات كوتشينه، كانت بتبقى أيام جميلة وبردو كنت ساعات أبقى مجهزة كل حاجة النجرسكو وندخل نطبقها سوا والله أيام الخطوبة كانت حلوة أوي، وقرب التجهيز كان كل الوقت بنختار صور وبندور على تفاصيل ديكور أو بوريه حاجات جديدة لسه جيباها الجهاز».

قعدة البلكونة

وقالت أمنية: «كنا في الصيف مثلا بظبط القاعدة في البلكونة ويجيب اللاب توب وندخل نعمل فشار ونشوف فيلم، بابا يقعد معانا شوية ويلعبوا طاولة، يقوم معايا نعمل شاي أو قهوة ونرغي في المطبخ شوية ونكمل القعدة في البلكونة ونتخيل مستقبلنا الباهر، والحمد لله اتجوزنا خلاص وبنعمل الفشار ونشوف الفيلم في بيتنا».