البنات على «فيسبوك» تكشف تأثير الزواج عن حب.. «هتعملوا إيه لو إتجوزتوا إللي بتحبوهم؟»

إحدى الفتيات نشرت سؤالا على إحدى جروبات البنات بالسوشيال ميديا قائلة:«هتعملوا إيه لو إتجوزتوا اللي بتحبوهم»، وجاءت التعليقات مبهجة تدل على أن الفتيات تشجع الزواج عن حب وتنتظر قصة الحب التي تعيشها طوال العمر مع فتى الأحلام.

قالت أية معلقة على المنشور: «يااه ده أنا هموت من الفرحة وعمري ماهقل منه وهحاول أخليه يشوف نفسه جميل ومفهوش غلطة وهقف جمبوا ومش هخليه يندم ثانية واحدة أنه اتجوزني وهبقي ليه كل حاجة وهخليه أكتر إنسان سعيد في الدنيا وهعيش بس عشان أسعده وأعوضه عن أي حاجة وحاجات كتير أوي بس هو يشوفني بس».

وقالت سمر: «أجمل حاجة بجد إن إللي بيحبوا بعض يتجوزوا بس فعلا يكونوا بيحبوا بعض مش مجرد مشاعر وهمية».

وعلقت ياسمين ساخرة: «والله مش عارفه احتمال أخليه بترفد من شغله لأني مجنونة وهروح معاه».

بينما قالت هالة: «هفضل أشكر ربنا عمري كله إنه حققلي حلمي إللي بتمناه»، بينما علقت حور: «هطلع أعمل عمرة وأحج وأكمل إللي باقيلي معاه على صفحة بيضا مفيهاش ولا نقطة سودا».

وعلقت سلمى: «يالهوي دا أنا هشيله جوا عيني هو يطلب وأنا أنفذ وهفضل أنكش فيه وبدل ما يضربني يقوم واخدني في حضنه هعمله كل الأكل إللي بيحبه وهسمع كلامه دايما وأول أسبوع جواز مش هخليه يطلع برا البيت هبقي بصاله طول الوقت في حاجات كتير أوي هعملها لو اتجوزته والله».

وقالت أسماء في تعليق: «يا لهوي بجد أنا هقوم أصحيه بحنية من النوم وبهدوء وأعملوا الأكل إللي بيحبه هفضل أسمعه وأخليه يحكي أي حاجة تدايقه هحضنه واحتويه على طول مش هسيبه يزعل ولما الدنيا تضيق بيه يجيلي يفضفضلي أنا هعملوا كل اللي يعوزوا وهشيلوا من على الأرض كده وهننزل نتمشى بالليل في هدوء لوحدنا لما يصحي واكله بأيدي الاكل اللي بيحبوا هنزلوا لحد تحت العماره واودعوا وبجد لو بإيدي مبعتهوش الشغل واسيبه جمبي كده وميشفوفش غيري هعمل كده هخليه أسعد إنسان والله».

وعلقت أميرة: «هسجد لربنا حمد وشكر دايما، وهفضل أحمد ربنا أنه جبر قلبي، ودايما هكون حريصه مش ازعل ربنا مني لأنه جبر خاطري وعشان مش يحرمني من حبي، وهحافظ علي حبي بما يرضي الله يارب يرضي قلوبنا كلنا».