كلام ستات

«بنتي مخطوبة لواحد حابسها».. والبنات على فيس بوك: «مريض وجوازة فاشلة»

الخميس 05/مايو/2022 - 11:50 م

ساندي جرجس

نشرت إحدى الأمهات مشكلتها على موقع التواصل الاجتماعي "فيس بوك"، حيث اشتكت من مخاوفها على ابنتها المخطوبة من شخص غير مناسب يحاول كبت حريتها والسيطرة عليها، وكانت التعليقات ونصائح البنات الأخريات تشير إلى ضرورة فسخ الخطبة.

وكتبت الأم: «انا بنتي مخطوبة، واختصار الكلام: خطيبها قال تمسح فيس وواتس وانا اقنعتها وبعد كدا قال تغير الخط ومتحطش أي أرقام ولا خال ولا عم ولا أي حد خالص وتمسح كل أرقام قرايبها ومتحضرش أفراح ولا تنزل معايا اجيب شغل ولا طلبات ويقول اصلي بغير عليها ودا حقي بس احنا شايفين أن الضغوط هتزيد بعد الجواز اكتر والمشكلة أن كل فترة ليه قرارات جديده ومش عايز يفركش لتحاول معاه وهو متمسك المشكله ان الجواز هيبقى على شهر 8 للعلم هو أكبر منها ب 13سنه انا في حيرة وخايفه اظلمه ياريت تفيدوني من غير تجاوز للعلم قال لها هتروحي عند مامتك لما أكون فاضي».

وكانت التعليقات كالآتي:

قال لها آية في تعليق: «انتي هتتحرمي من بنتك وهي هتطفي وهتتكسر نفسها حرام عليكي والله وليه ١٣ سنة هو كده عاش حياته وعايز واحدة يشكلها علي دماغه ويحطها في البيت لراحته وللعيال».

شخص مريض

وعلقت أمنية: «طنط انتي كبيرة واعتقد باينلك انها جوازة فاشلة وواحد متحكم و مريض، ليه تحكمي على بنتك بالاعدام وهي لسه في حضنك.. الحقيها من دلوقتي بدل ما ترجعلك بعد كدا يعيل و اتنين مضروبة، لا ودا ممكن ميخليهاش تنزلك اصلا!».

وقال داليا: «بعد الجواز هيقولها ولا تكلم اب ولا ام ... ايه القرف ده بجد ليه علشان تاخد لقب انها متجوزه بلا قرف».

هتعيش زي المساجين

كما علقت سارة: «لا ده كده مش طبيعي طب الفيس بوك والواتس اب على الأقل هيخلوها تتواصل مع صحباتها البنات و تعرف الدنيا فيها ايه دي كدة هتبقى شبه المساجين بالظبط».

وقالت داليا: «مستنيه ايه تانى وانتو على البر هو مش عاوز يفركش انتو ابعتوله حاجته وفركشوا عافيه ولا ذوق بنتك فى رقبتك هيخنقها حرام عليكى».

وعلقت علا: «البقاء لله فى بنتك لو كملت مع المجنون ده ده مريض نفسى و عادى جدا ممكن فى اى وقت يشك فى بنتك و يقتلها، انتم بتعملوا ليه كده فى بناتكم حرام عليكى يا شيخه فرق سن كبير وواحد مجنون و شكاك أرمى حاجته فى وشه و قوليله معندناش بنات للجواز وانفذى بنتك بلاش قرف بقى و ناس مريضه».

اقرأ أيضًا..