كشفت المخرجة روجينا بسالي، عن تحضيرها لفيلم تسجيلي جديد عن الراحل سعيد صالح بعنوان "زمن السلطان" وذلك عبر حسابها على موقع التواصل الاجتماعي"فيسبوك" وفجرت مفاجأة بشأنه.

وأوضحت المخرجة أنها أثناء تحضيرها للفيلم رأت جوابات من سجناء يطلبون فيها العون من الفنان سعيد صالح وأنه اهتم بها وحاول مساعدة هؤلاء السجناء.. وقالت في منشور لها: "وأنا بحضر فيلم -سعيد صالح- خدت من هند السنة اللي فاتت الحاجات اللي عندها كلها، ووسط الحاجات ديه لاقيت ظرف مكتوب عليه  - مطالب من سجناء".

وتابعت: "الظرف مليان جوابات من مواطنين عاديين بعتوا طلباتهم لسعيد صالح والمفاجأة إنهم كانوا بيتعاملوا معاه على إنه وزير الداخلية مثلًا وكانوا بيطلبوا مطالب مهولة ولا تتخيلها".

وأضافت: "الجوابات استمر إرسالها بعد خروجه من الحبس بوقت مش قليل، وفيها جواب مبعوت للرئيس مبارك شخصيًا ومطلوب منه يوصله ويتوسط لهم، الملفت اهتمام سعيد صالح لدرجة إنه قرأ بعناية شديدة كل الجوابات وكان عنده ملاحظات وتوقف عند جمل بعينها في الجوابات دي، وعندي يقين إنه حاول في بعض الحالات حتى لو بلا نتيجة لكن المهم إنه تعامل بجدية مع ناس شافت فيه أمل لحل مشاكلهم".

واختتمت روجينا: "متخيل الناس ارتبطت به للدرجة دي؟ طب متخيل إن الناس كانت حاسة بقيمته لدرجة إنهم يقدموا له مظالم ومطالب وهو سجين وإيده مربوطة زيه زيهم؟ متخيل إنه كان مهتم يقرأ ويكتب ملاحظات مع العدد ده من مشاكل الناس؟ حتى وهو عارف إن ما باليد حيلة!.. مش سهلة أبدًا الحالة اللي عملها والحب اللي كمل لحد النهارده.. حكاية نجم كبير ومهم حكايات زمن بحاله -زمن السلطان".

من جانبها علقت هند سعيد صالح ابنة الفنان سعيد صالح على منشور المخرجة روجينا قائلة: "طول عمره شاغل نفسه بالناس أكتر من نفسه، وده كان باين عليه جدًا، يمكن عشان كده توسموا فيه إنه ممكن يساعدهم".