امرأة بمليون رجل.. رحلة كفاح أم بشار للوصول بابنيها إلى بر الأمان
«مؤدبة ومترهلة».. زوج يسعى لطلاق زوجته لسبب صادم
الثلاثاء 22/نوفمبر/2022 - 09:09 م
ساندي جرجس
كتب رجل مشكلة على موقع التواصل الاجتماعي "فيس بوك" للحصول على الآراء للآخرين ومساعدته، ولكن أثارت مشكلته الجدل وغضب المتابعين، حيث يشكو من زوجته ويريد أن ينفصل عنها لأسباب صادمة.
وقال الرجل في المنشور: "أنا تزوجت من بنت خالتي من سنة ونص، بناء على مدح الجميع، وفعلا كانت على قد المدح بخلقها وطيبتها، وبعد الزواج اكتشفت فيها جوانب أخرى مثل الحنان والعطف والرقة والثقافة، وهي متوسطة الجمال كشكل خارجي لكن بعد الزواج وده اللي تعبني منها اكتشفت إن جسمها كله خطوط وترهلات والموضوع ده قافلني منها ومش بقرب منها كتير ودلوقتي دايما بفكر في الطلاق لكن اللي ماسكني ومخليني متردد علاقة القرابة بين العائلتين والمشاكل اللي هتحصل لو طلقتها ومش بعيد يقاطعوا بعض نهائي".
وأضاف: "مش عاوز أظلمها معايا لأن أحياناً لا شعوريا أقسو عليها بالضرب او السب بلا سبب مع العلم هي أكبر مني بسنة، ومعانا طفل لسه 4 شهور ومش عارف أعمل إيه، وموضوع إني أتزوج عليها حاليا مش مقتدر لأن لسه ديون جوازي مخلصتش وأصلا مقدرش أصرف على بيتين، فهل الطلاق في الحالة دي صح؟، مش عاوز أظلم نفسي وأضيع عمري مع حد مش عاوزه".
وجاءت التعليقات كالآتي:
- الرجولة في خبر كان
قالت صابرين في تعليق: «يا خبر أبيض طلاق عشان ترهلات وخطوط؟ يعني كل الاعتبارات الأخرى مالهاش قيمة! وفي طفل كمان بتفكر تخلع وخلاص هي لعبة جربتها وزهقت وعاوز تغير؟ ما فكرتش في علاج طيب؟ دي حاجة بسيطة أصلا ومع المتابعة والاهتمام بتتظبط لا وكمان للسبب ده بتضربها وتسبها الأخلاق والرجولة في خبر كان مش لاقية وصف مناسب لا يخرج عن حدود اللياقة لموقفك ده والله ربنا معاها».
كما علق رضا: «الحاجات دي أكيد لها علاج.. والصفات التي ذكرتها في أخلاقها وحسن تعاملها تكفى لأن تعوض أى حاجة مش عاجباك فيها.. ارضى بنصيبك وبلاش نمردة وبلاش تمد يدك عليها».
ملكش فى الطيب نصيب
وقالت إيمان: «بجد مش عارفه أوصف الرجل اللى يكشف ستر زوجته على الملأ كده هل هذه رجولة.. الحاجات دي محتاجه ستر وكل شيء وله تخصصه كنت تقدر تكلمها بينك وبينها وهى أكيد كانت هتدور على الحل عشان ترضي سعادتك ومين اللى اعطاك الحق إنك تهينها وتضربها وتسبها باللى يؤذى مشاعرها.. وياترى حضرتك خالى من العيوب؟.. هى بكل المواصفات اللى انت قلتها تستحق حد أفضل منك.. عشان كده سيبها للى يستحقها وانت دور على اللى يريحك.. ويبقى ملكش فى الطيب نصيب».
كما علقت نفيسة: «يعنى مؤدبة ومحترمة عايز إيه تاني؟ الكمال لله وحده، وأنت ملاك مفيش فيك ولا عيب؟ هي حاليا أم طفلك وبنت خالتك اتقى الله فيها ممكن تاخدها قمر وتتعب وتكون أخلاقها سوء كنت حتعمل إيه كل شيء له علاج».
وقالت جيهان: "لو على الخطوط البيضا في جسمها تقدر تعالجها وتبقى أحسن من أحسن جسم بتشوفه في النت، البنت كويسة وحنينة وفيها صفات جميلة صعب تلاقيها، اتق الله فيها وارجع لدينك واحفظ رجولتك وتذكر دائما كفي بالمرء إثما أن يضيع من يعول هي لديها عيب في الجسد يسهل أن يعالج ،اما اذا ضاعت الرجولة فلن تعود".
اقرأ أيضًا..
