بنات دمياط لا تعرفن «الأيدي الناعمة».. مُبادرات لتنظيف شواطئ رأس البر

الإثنين 22/فبراير/2021 - 06:04 م

ميادة فتحي

مجموعة من الفتيات، ارتدين «كمامات والجلافزات»، يقبضن بأيديهن أكياسًا بلاستيكية، تتجولن في شواطئ رأس البر بمحافظة دمياط، يقومن بتنظيفها، متحدين برودة الجو، لإيمانهن أن النظافة من الإيمان، وأنه لابد أن يُشارك الجميع في نظافة بلدهم.

مروة أحمد، إحدى الفتيات اللاتي قمن بتنظيف شواطئ رأس البر في دمياط، تروي لـ« هير نيوز»، تجربتها قائلة: « الفكرة بدأت بنشرنا منشورات على موقع التواصل الاجتماعي "فيس بوك"، من كام يوم وقولنا إننا هنتجمع في مكان وهنروح ننظف شواطئ رأس البر، لما لقينا فيها مهملات وقاذورات رغم أننا في الشتاء مش في الصيف، وفعلًا الناس استجابت وكنا مجموعة فتيات وشباب، اشترينا أكياس وأبلغنا الوحدة المحلية وروحنا ننظف الشواطئ».

بينما تضيف أيه محمود، قائلة: « بلدنا أجمل بينا ولازم نحافظ عليها، والحكومة وحدها مش هتقدر تعمل كل حاجة، إحنا كمجتمع علينا دور لازم نقوم بيه، أقله ننظف الشواطئ اللي هي أساس السياحة عندنا، ومعندناش مانع ننظف الشوارع، ودا مش هبة مننا لا دا واجبنا ناحية بلدنا، عمال النظافة مش هيقدروا يعملوا كل حاجة وحدهم، لازم نساعد بعض».

أوضحت "ميار علي"، قائلة: «هنتحرج ليه، كل واحدة فينا بتنظف أوضتها أو بيتها، ماهي دي برضو بلدنا، اللي اتربينا فيها واللي هي زي بيوتنا لازم تكون في أحسن احوالها لما يجيها ضيوف، والحقيقة كان في تعاون من الوحدة المحلية، وظفنا الشواطئ كلها وكنا بنات وأولاد، يمكن بعضنا ميعرفش بعضه، لكن الهدف الحلو جمعنا».