الثلاثاء 18 مايو 2021 الموافق 06 شوال 1442
رئيس مجلس الإدارة
خالد جودة
مدير التحرير
وصفي ابو العزم
رئيس مجلس الاداره
خالد جوده

الدكتورة رانيا يحيى تكتب: الاختيار خيارنا يا عرسان الجنة

الجمعة 23/أبريل/2021 - 02:11 م
الدكتورة رانيا يحيى
الدكتورة رانيا يحيى

محنة صعبة مفيش أصعب منها أمّا قلب الأم يتكوي بنار ضناها اللي راح ضحية للغدر والخيانة، لكن اللي يبرد قلبها إن ابنها راجل بيحمي بلده وبيحمي ناسه أرضه وعرضه، عقيدة عند رجالة بلدنا إن الأرض عرض، وولاد بلدي مايفرطوش في عرضهم أبدًا.

أحداث كتير عشناها وشفنا التحديات بأعيننا وسمعنا كوارث قتل ودم وضحايا، علشان احنا نعيش في أمان دفعوا الثمن غالي أوي، بس مش أغلى من مصر.

الاختيار بيأكد لنا كل يوم إن هو دا خيارنا الوحيد بلا منازع، بيحرك فينا مشاعر الوطنية وبيذكرنا بأحداث مؤلمة بس مهم أوي إننا نفتكرها، مش بس، لكن كمان نتعلم يعنى إيه تضحية، ويأكد لنا قَسم ولادك يا مصر المحفور على الجبين، ويقول لنا إن الست المصرية عرفت تعلم وتربي رجالة، يتضرب بيهم المثل في كل مكان.

وأما نشوف وقائع ونتخيل اللي حصل في كل حادثة من دول بتفاصيلها بنحس بالتار، وإن بجد ولاد بلدنا دول دمهم في رقابنا كلنا، وإن معدومي الدين والضمير مصيرهم إلى زوال.

المصريين مقدرين كم التضحية، وعارفين إن الاختيار له ثمن من 2013 ولغاية دلوقتي، والله أعلم الدور جاي على مين، ورجالتنا بينزلوا مهماتهم وبيأدوا أدوارهم وكل واحد عارف إنه ممكن مايرجعش تاني، إحساس قاسي ومؤلم بيعيشوه أهالي العسكريين كل يوم وكل لحظة بس الجميل إن الناس كلها تحس وتعرف وماينسوش، ويشوفوا بعينهم الفجرة بيقتلوا ولادنا ويحاولوا يدمروا بلدنا، لكن على مين!! والله لو هنموت كلنا فداها ستات ورجالة وأطفال عمرنا ماهنسيبها ولا هنخذلها، وهيفضل الجيش والشرطة إيد واحدة سند لنا ولبلدنا، ومبروك عليكم الجنة يا عرسانها، ومبروك علينا الاختيار.


________________________
عضو المجلس القومي للمرأة
________________________
الأخبار

الكلمات المفتاحية