التعليم تكشف عن تفاصيل أسئلة امتحانات الثانوية العامة لعام 2024
الجميلة ميرنا وليد: بقضي وقتي مع ولادي في ضحك ولعب وجد وحب
الإثنين 17/مايو/2021 - 11:40 ص
ميرنا وليد: بقضى وقتى مع ولادى فى ضحك
هي فنانة عاصرت نجومًا كبارًا، وعملت معهم منذ صغرها، وتمتلك رصيدًا كبيرًا من الأعمال الفنية، ولديها أدوار يعشقها الجمهور لها، أبدعت في عملها، ونجحت في استقطاب جمهور كبير لها، إنها الفنانة ميرنا وليد.
"هير نيوز" حاورت ميرنا وليد للتعرف على جوانب أخرى من شخصيتها، وعلاقتها بأسرتها في عيد الفطر، فإلى الحوار:
كيف قضيتِ وقتكِ بصحبة بناتك فى العيد؟
ضحك ولعب وجد وحب، وشوية خناق زي أي أم عندها بنات أشقياء زي اللي عندي، طول النهار بنلعب أو نتفرج على فيلم سوا أو نتخانق أو نذاكر أو بزعق، بحب قوي الأوقات اللي بقضّيها معاهم بتفاجأ أوقات أنهم كبروا بطريقة كلامهم، والحمد لله مبسوطة جدًا بيهم، ربنا يحفظهم.
وما أكثر النصائح التي تحرصين عليها معهما؟
بحاول أديهم نصائح على قدر الموقف الذى يحدث، وبكرر النصيحة مرة واتنين، وأقول ممكن مع الوقت لازم هيفتكروها، هما زينا أكيد وإحنا صغيرين كنا ساعات بنسمع النصايح ومبنهتمش بيها، بس لم كبرنا عرفنا بقيمة الكلام والنصائح اللى أهلنا كانوا بيقولوها لينا، واصبحنا نعي اهميتها، بحاول إنهم يكونوا قريبين من الناس ويعرفوا إن مفيش حد أحسن من حد بالشكل أو بالمستوى مهما اختلفنا، وأن الكلمة الطيبة دايمًا لازم تكون هي الأولى فى حياتهم والتعامل بالاحترام.
ما أكثر ما يقلقكِ عليهما كل ما يكبروا؟
كل حاجة والله، إحنا بقينا فى زمن غريب كثرة المشاكل اللى بقينا بنسمع عنها من تفكك فى المجتمع، وسرقة الأطفال، وتجارة الأعضاء حتى الإنترنت اللى أبعد الناس عن بعض.
تعتبرين من الفنانات اللواتى ضحوا بالفن من أجل بناتهن، هل توافقين على هذه العبارة؟
مقدرش أنكرها؛ لأن تربية الأولاد بتاخد وقت كبير جدا وإرهاق، والمطالب كتير، وعشان تخدي بالك منهم كويس ومن تحركاتهم ومن أصحابهم لازم يتطلب تفرغ تام، بالفعل برفض كثير من الأمور فى حياتى بسببهم، وعندما كنت حامل فى ابنتى الثانية اعتذرت عن أعمال كثيرة جدا عُرضت عليَّ وقتها، وكانت بالفعل أعمال حلوة جدا ومتميزة.
أكثر الأماكن التي تحرصين على الذهاب معهم إليها خصوصًا فى المناسبات كالعيد أو رأس السنة؟
مش مكان معين بس بحب اكون متواجدة معاهم فى أي مكان بيحبوا يروحوا، مثلا السينما أو خارجين مع أصدقائهم، بحب أخرج معاهم فى أي مكان يكونوا مبسوطين فيها، وبنسافر مع بعض جوه مصر وبره مصر.
ما الذى يميز كل واحدة منهما ومن هى التى أخذت صفات أكثر منكِ؟
الاتنين واخدين مني حاجات، شكلًا مش شبهي، ولكن لهم طلتي، تحسي أنهم بناتى، ابنتي الكبيرة برجها العذراء مثلي فيها طباع مني؛ لانها نفس البرج والصغيرة برضه واخده مني بعض الطباع.
هل تمانعين يوما إذا تمنت إحداهما أن تدخل عالم الفن؟
ما أقدرش أقول لا، وما أقدرش أقول آه، أنا لا أشجعهم، ولكن ما أقدرش أمنعهم، دوري فى الحياة أدعمهم فى اختياراتهم إذا تمنت إحداهما أن تصبح فنانة، أنا مش هسهّلها الأمور وأشجعها، لا، أنا هسيبهم يختاروا اللى هما حابينه وعاوزينه، دورى فقط هو المساعدة والتوجيه أيًّا كان اختيارها، أنا بشوف كل المهن ممكن استخدامها فى أمور إيجابية أو سلبية، فى الفن فيه أفلام للجميلة رحمة الله عليها فاتن حمامة غيَّرت فى القوانين وغيرها، والفن كفن بحبه وبحترمه جدًا خصوصًا إذا كانت الأعمال موجهة صح.
حافظتِ على احترام الجمهور فى اختيارك لأدواركِ، هل هذا ظلمك؟
بحب احترام الناس ليَّا، وبحسه كتير بطريقة كلامهم ممكن يكون ظلمنى فنيا، ولكن مش مضايقة من الظلم ده، هناك أدوار كثيرة جدا لو كنت وافقت عليها وعملتها يمكن كنت أكون فى مكان تاني، بحس الحياة مش سعادة من جانب واحد فقط، كل شخص بيدور على نجاحه وسعادته، أنا الحمد لله بتبسط فى شغلي جدا، ولكن لا أتغاضى عن أمور فيه من أجل النجاح وأعمله فى ضمن الإطار اللى أرضاه لنفسى، وبشوف أنى النهارده لما بأقعد مع بناتى ويتعرض عمل لي لا أقلق ولا أُحرج منهم فى أي شيء؛ لأني متأكدة من أن مفيش سؤال منهم ليَّ على أي دور هيؤذينى أو أخجل منه، والحمد لله نوعية الأعمال التى قدمتها معظمها كانت علامة فى الدراما المصرية.
