أخصائية نفسية تُحذر: أوعي تخلي ابنك عينه مليانة

أكدت الدكتورة سهام حسن أخصائية نفسية وتعديل سلوك، أن توفير كل الطلبات المادية للأطفال على اعتبار أن الطفل "هيطلع عينه مليانة" هو اعتقاد خاطئ، لما قد يترتب عليه من تشوهات سلوكية عند الأطفال، ومشيرة إلى أن الطلبات الواجب توافرها هو الوقت، وجلوس الآباء مع أبنائهم، وذلك خلال فيديو نشرته على قناتها على اليوتيوب.

وقالت سهام: "كتير مننا بيشوف التربية إني محرمش ابني وأوفرله كل اللي يطلبه، وبننسى إن ممكن ده يكسبوا أمور سيئة في سلوكياته احنا في غنى عنها، ولو كبروا عليها كل اللي حواليا هيلومني على تربيتهم، لأنهم أصبحوا أشخاص أنانيين".

وأضافت حسن: "هيبقوا أنانيين هيبقوا محتاجين كل حاجة وكل حاجة ليهم وحدهم، وهيتعلموا الطمع وعدم الشبع، وهيتعلموا الفتور وفقد الملكية، وهو صغير هيزهق بسرعة من اللعب وعاوز غيرها، هيكسر ويخرب في كل حاجة؛ لإيمانه واعتقاده الشديد إنه هيكسر وماما هتجيبله غيرها" .

ونصحت سهام: "أطلع ابني مش محروم حنية وطيبة وأخلاق ، مش محروم اهتمام وسلوكيات كثير، ولا محروم زرع المبادئ والأسس الدينية، ومعوضش غيابي عنه بالماديات، لإن الأطفال مع الوقت بيفهموا إن الهدايا والفلوس تعويض عن الغياب، وفي أطفال بتعبر وتقول أنا مش عاوز فلوس، ولا ألعاب، أنا عاوزك تقعد معايا، وفي أطفال بتستغل الوضع، ويطلبوا طلبات كتير؛ أنا عاوز موبايل جديد، أنا عاوز كذا زي صاحبي"

وأشارت إلى أن ربع ساعة يوميا مع أولادنا أحسن من ألف لعبة، "اللعب معاهم والجلوس معاهم كلها أمور تحفر في أذهانهم، وبعد توفي الوالدين بعد عمر طويل يتذكر أولادهم هذه المواقف، ويفتكروا إنهم متحرموش منها".

اقرأ أيضًا..

البروتين مهم جدًا.. نظام غذائي يحمي طفلك من التقزم