فوائد فيتامين سي وأعراض نقصه في الجسم
منى زكي تكشف ماذا فعل أحمد حلمي لكي يتقرب منها.. وتعترف: أبويا وأمي رفضوا جوازنا
الثلاثاء 24/أغسطس/2021 - 10:19 ص
أكدت الفنانة منى زكي أنها لم تحب الفنان أحمد حلمي قبل زواجهما بسرعة بسبب الحنان الذي حصلت عليه من والدها والذي كان يجعل أي شاب لا يلفت نظرها مهما فعل.
وأثنت منى زكي خلال لقائها مع الفنانة إسعاد يونس في برنامج «صاحبة السعادة» المذاع عبر فضائية «dmc» على زوجها الفنان أحمد حلمي «مش عشان هو جوزي بقول كده.. بس هو عنده نبل ورقي وطيبة في التعامل مش عادية وعنده تسامح يفوق أي حد قابلته في حياتي.. ده شخص من جوة إيه الحلاوة دي ومثقف قوي ومتفتح جدا وبذوره أصيلة ورغم إنه من بنها لكن متفتح وعنده رقي.. شخص من جوه أصيل وإيه الحلاوة دي .. مثقف أوي ومتفتح جدًا».
وأوضحت منى زكي أنها توقَّعت عدم موافقة عائلته على الزواج منها لكونها ممثلة: «إزاي أهله هيوافقوا عشان أنا ممثلة وده شيء مش سهل وده شيء صعب في الوطن العربي وكنا بنحاول نتكلم كتير ووصلني إني مش هقدر أعيش من غيره وكل لما نبتدي نتكلم أكتر تنمو عندي حاجات كتير تجاهه».
صغير ومش هيعرف يبسطك
وأشارت إلى أنها أحبته وتوقعت أن يرفض والدها ووالدتها زواجها من أحمد حلمي؛ نظرًا لأنها «خُطبت» قبل فترة وأنهت الخطوبة، مؤكدة أن والدها كان رافضًا لفكرة زواجها في هذا التوقيت وأنه ووالدتها رفضا زواجها من أحمد حلمي وتوقعا أنه لن يستطيع أن يعيش معها «صغير ومش هيعرف يبسطك» لدرجة أن والدها بكى بسببها.
والدي اختلق مشكلة
ولفتت منى زكي إلى أن والدها نوى أن يضيق عليه في مسألة الشبكة ولكنه تراجع وتعاطف معه بسبب إمكانياته، مشيرة إلى أن والدها اختلق مشكلة في كتب الكتاب واتصلت بجدتها لتقنع والدها بأن يكتب كتابها.
وتحدثت منى زكي عن صديقاتها، مشيرة إلى أنهن لم يتزوجن حتى الآن إلا صديقة واحدة فقط، مشددة على رفضها لكلمة «عانس» معتبرة أن الأمر حرية شخصية.
سعادة الجمهور
أكدت الفنانة منى زكي على شعورها بسعادة الجمهور بها وبزوجها الفنان أحمد حلمي كزوجين، مضيفة: «بقا خايفة انهم يبقوا فاكرين الحياة زي ماهم بيشوفوها بس ويبقوا متوقعين ان الحياة زي ما هم بيشوفوها من برة بس».
اللقاء الأول
وتذكرت اللقاء الأول مع زوجها الفنان أحمد حلمي «أول مرة قابلت حلمي كنت في مكتب الأستاذ محمد فوزي المنتج وكنا هنعمل مسرحية بطولة عامر منيب الله يرحمه وكنا كتير قوي وبعدين فجأة المنتج محمد فوزي قالي فيه دور بفكر أجيب فيه أحمد حلمي ووقتها حلمي كان بيعمل برنامج لعب عيال».
معرفش شكله إيه
وأضافت: «معرفش شكله إيه ووشه إيه بس فعلا برنامج لعب عيال بنتفرج عليه أنا ومامتي ولما المنتج قالي عايز أجيبه قولت يا ريت ده برنامجه لذيذ قوي وكنت عايزة أشوف وشه لأنه بيطلع في البرنامج بضهره والمهم جابه المكتب وقاعدة في المكتب مع الأستاذ محمد فوزي ولقيت حد سلم عليا ومبصش عليا وهو بيسلم وقعد اتكلم مع محمد فوزي وجاله تليفون ودخلنا البلكونة أنا ومحمد فوزي وبيقولي إيه رأيك قولت له رخم قوي وده ألذ قوي في التليفزيون وحقيقي لا مش لذيذ قال لي لا ما هو هيمثل».
لقيته لذيذ
وتابعت: «بدأنا بروفات ولقيته لذيذ وبعدين عملنا مسرحية وكنت همشي منها وجه بيقولي انتي مش جاية بروفات تاني قلت له ليه قالي عشان لو مش جاية تاني ناخد نمر بعض ونسأل على بعض يعني وهو حس إني مش جاية وقولت له غالبا هفك مش هكمل واخدنا نمر بعض وبقينا نتكلم في التليفون عادي وبقينا أصحاب قوي وعرفته على أصحابي المقربين قوي وفجأة اعترف لي إنه بيحبني».
وتذكرت منى زكي موقفًا فعله أحمد حلمي لكي يتقرب لها؛ حيث سقط منها هاتفها المحمول أثناء سيرها بسيارتها و«داست» عليه سيارة ملاكي وحزنت على ضياعه بشدة؛ لتفاجأ بعدها بأحمد حلمي يحضر لها هاتفها وهو سليم تمامًا.
