متصل يبكي على الهواء: «مراتي بتضربني وبتاخد فلوسي».. وإعلامية: «اعملها محضر»| فيديو

أثارت مكالمة مع برنامج "كلام الناس" المذاع عبر قناة MBC مصر، الجدل خلال الساعات القليلة الماضية، بعدما بكى فيها مواطن يُدعى "أحمد" من محافظة القليوبية، على الهواء؛ بسبب تعرضه للتنمر والضرب على يد زوجته الذي تزوجها منذ 20 عامًا.

وقال "أحمد" باكيًا في مكالمته مع برنامج "كلام الناس":" أنا متجوز بقالي 20 سنة ومراتي بتهزقني وبتشتمني وبتضربني وبتمد إيدها عليَّ رغم إني كنت في السعودية وبرسل لها كل اللي هي عايزاه، وعمري ما عملت حاجة غلط معاها".

وأضاف: "مراتي بتفضل تضرب فيَّ بالبنيات ومش عارف أعمل معاها إيه، أنتحر يعني ولا أعمل إيه؟ أنا عندي 55 سنة ولما جيت من السعودية بشتغل أي حاجة، ونزلت مصر بعد جائحة كورونا، وخلصت كل فلوسي على مراتي وهي تصرف براحتها، ودلوقتِ بتمد إيديها عليَّ وأنا مش عارف أعمل معاها إيه".

وتابع المتصل الباكي وقال عن أبنائه: "معايا ولد في الجيش وطالب في الثانوية العامة، وبنت عمرها سنتين، ومحدش من ولادي بيوقف زوجتي عند حدها، وأولادي كمان بيمدوا إيدهم عليَّ، وأنا مش عارف أعمل إيه في أمهم أنا راجل ضعيف ومليش لا أخ ولا حد يقف معايا".

وردت الإعلامية ياسمين عز وحاولت تهدئته حتى لا يُصاب بأي مكروه، وطالبته بعدم التفكير في الانتحار، وطالبته أيضًا بأن يحرر محضرًا في أحد أقسام الشرطة ضد زوجته.

وخلال الساعات الماضية شكك بعض من مستخدمي منصات التواصل الاجتماعي المختلفة، في حقيقة تلك المكالمة، ولكن من جانبها نفت الإعلامية ياسمين عز فبركة تلك المكالمة، وقالت: "كلماته أثرت فيا وانقهرت عليه، وكان معانا ضيوفنا ودكتور إبراهيم رضا كان مش متعاطف بشكل كبير وقال إننا سمعنا من طرف واحد، وأكيد مراته لها كلام تاني".

وقالت ياسمين عز إن البرنامج يسعى للتواصل مع زوجة المتصل وقالت: "التواصل مش بهدف أننا نعرف خصوصياتهم، أبدا، لو حاجة نقدر نحلها هنحلها وهنبلغكم، وهنعمل فقرة مخصوصة عن العنف ضد الأزواج".

وأضافت أن البرنامج والقناة لا يختلق المكالمات ولا يبحث عن التريند، قائلة: "لا يا حبيبي، أخطأت خطئًا كبيرًا، إحنا لا بنتفق مع حد ولا نسعى للتريند، ده ما بيحصلش هنا".

واختتمت: "أنا أصلا مابحبش كلمة تريند ومش هدفي ولا هدف البرنامج، هدفنا نعمل برنامج مميز متعوب على كل تفاصيله، يهمنا نكون براند في السوق مش تريند".