أحمد سعد يرد على سخرية سمية الخشاب من إطلالته بالسعودية

وقال أحمد سعد خلال حفل توزيع جوائز ميدل إيست ميوزك أورد MEMA إنه من المؤكد أن سمية الخشاب لا تتصيد له الأخطاء، وأن هجوم الجمهور عليه كان من أجل مصلحته.

وأضاف: "سمية الخشاب تقول اللي هي عايزاه، وكل واحد يقول اللي هو عايزه وهما كلهم جمهوري وكلهم ناس عايزين مصلحتي، وإنها ترقص على أغنيتي أكيد هي بتحب تشجعني دايماً وأكيد بتحبّلي الخير وإني أكون ناجح، وأكيد الناس مش عايزة تصطاد ليا الأخطاء، كلهم عايزنّي أبقى أحسن وبقيت بالفعل".

وعن الانتقادات التي تعرض لها من الجمهور، اعتبر أحمد سعد أن ذلك يعد نوعاً من الحب موجهاً الشكر لكل من هاجمه لأنه أشعره بأنه فرد من أسرته.

وتابع: "أشكر كل الناس اللي هاجمتني، لأنهم شايفين إني فرد من أسرتهم وواحد منهم ومارضيوش عليا كده إني ألبس حاجة وحشة، حسيت إني جوا كل بيت وجوا كل أسرة، مش هظهر كده تاني، ولو في حاجة شبك هخيطها أنا على أيدي".

ولفت إلى أنه ليس لديه إصرار على الخطأ، قائلاً: "الناس شايفنِّي في حتة تانية وجوا بيوتهم وأسرتهم، ياما ناس لبست كده ولبست حاجات تانية، ولكن أنا فعلاً مش من الناس اللي بتصر على الحاجات الغلط، وبطلع أقول أنا غلط طالما معجبهمش"

وكانت سمية الخشاب نشرت تدوينة بالتزامن مع حالة السخرية من ملابس أحمد سعد، وذلك عبر حسابها الشخصي على تويتر قائلة: "وأنا أقول لبسي راح فين"، دون أن توضح المقصود من حديثها.

وربط البعض بين تلك التدوينة وظهور أحمد سعد بإطلالة وصفها البعض بالنسائية لاعتماده على بلوزة سوداء بتصميم الذراعات الشفافة ووضع حلق في أذنه خلال حفله في المملكة العربية السعودية.