أحمد السقا يكشف كواليس معاناته في تصوير مسلسل حرب

كشف الفنان أحمد السقا، كواليس معاناته أثناء تصوير مسلسل "حرب" الذي يعرض في رمضان 2023.

وقال أحمد السقا في تصريحات إذاعية له اليوم: "كنت بنام على سرير مكون من مسامير بجد، كانت مبرودة بطريقة معينة وحد بيمسكني لحد ما أنام على ضهري ومقدرش أقوم لوحدي لازم حد يقومني عشان مضغطش نفسي عليها واتخرم".

وأضاف احمد السقا: "كنت مرعوب من عرض المسلسل في التلت الأخير من رمضان، وبقيت بدعي ربنا يارب متخذلنيش، وبفضل الله وأحمد نادر جلال قدرنا نطلع المسلسل بالشكل اللي يليق، وأنا بسميه حفيد العظماء مكنش بينام بنخلص تصوير ويقعد على المونتاج وتصحيح الألوان".

وقال "السقا": "خدت الريسك ده وقولت حاجة من الاتنين يا هتلبس في حيطة يأما هتبقي كنست تاريخك كله وأخدت قرار أني أنا مش هشتغل الإرهابي بالشكل التقليدي وهعمله جاحد".

واردف أحمد السقا: "بالنسبة لشكلي المرهق في المسلسل هو إني خسيت ونزلت وزني الفترة اللي فاتت؛ لأني كنت باخد كورتيزون ولما وقفته بعناية الأطباء بقيت فرحان بشكلي في المسلسل".

وتابع: "أنا بشتغل مع فريق عمل قعدنا نشوف هنعمل فرق السن إزاي، والدقن اللي كنت بعملها في الأول كان تركيبها بياخد ساعة ونص لأنها بتترسم شعرة تلو الأخرى عشان تبان طبيعية، أما فيما يخص هدوء الشخصية لما تشوفي النهاية هتعرفي إن الراجل ده مش صاحب مبدأ ومش عايز احرق الأحداث، واللي كان بيحركه حاجة تانية خالص".

واستطرد أحمد السقا: "اشتغلت من طبقة صوت لحد دلوقتي تعباني.. الطبقة عريضة.. لحد دلوقتي باخد أدوية، وقولت مش هعمله بالشكل التقليدي وأجري على الله، والحمد لله لاقى استحسان الناس".

وعن تقديمه لدور الإرهابي قال: "كل الناس كانت مستغربة إني وافقت، وكان هدفي إني اتكره؛ لأني لو اتحبيت وأنا إرهابي تبقى مصيبة سودا، الحمد لله ربنا وفقني في تحضير الشخصية مع فريق العمل ووصلنا لشكل خارجي كويس".