فرح الزاهد تكشف عن معاناتها من مرض نفسي: عايشة في كابوس

كشفت الفنانة فرح الزاهد عن معاناتها من مرض نفسي، مؤكدة انها تعيش في كابوس معظم الوقت، كما تحدثت عن علاقتها بالسوشيال ميديا، ودورها في فيلم "عصابة عظيمة" مع الفنانة إسعاد يونس.

قالت فرح الزاهد خلال حديثها مع الإعلاميات منى عبد الغني، وإيمان عز الدين، ومها الصغير في برنامج "الستات مايعرفوش يكدبوا" المذاع عبر قناة CBC: "أنا عندي وسواس قهري من وأنا عمري 7 سنين، وده مرض اسمه سرطان الأمراض النفسية، والشخص المريض به عنده اكتئاب وقلق أكيد".

وتابعت: " الوسواس القهري مستويات وأنواع، والحمد لله أنا مش واصلة لدرجة إني مش بسلم على حد أو اللي بيغسلوا إيديهم كتير، لكن لازم أنظم نفسي جدا".

كما عبرت فرح الزاهد عن رغبتها في تقديم شخصية مريض الوسواس القهري وقالت: " أنا عايشة في كابوس طول الوقت، والأوقات اللي بفرح فيها قليلة جدا، وطول الوقت مخي شغال، وإحنا عندنا معاناة داخلية كبيرة جدا محدش يعرف عنها حاجة".

كما كشفت فرح الزاهد خلال اللقاء سر ابتعادها عن السوشيال ميديا وقالت: " السوشيال ميديا بتجيب اكتئاب، وعلى الرغم من إنه في أوقات بنتستفاد منها، لكن فيه أوقات بتجيب اكتئاب فظيع، ومفيش حد بيحب ينشر بوست عن الفشل بتاعه، ولذلك بتشوفي كل الناس ناجحة، والناس بتقيس على ده حياتها، وأنا حتى معنديش فيس بوك.. عندي انستجرام بس.

وأوضحت فرح الزاهد أنها لا تحب المجاملات في العمل، فهي دائما ما تبحث عن أخطائها وتحاول تصحيحها، وقالت: " أنا دايمًا بشوف عيوبي، وفي فيلم شوجر دادي أول تجربة سينمائية ليا الناس اتبسطت وقالوا لي أنتي كنتي حلوة ولذيذة لكن أنا شفت حاجات الناس ما شافتهاش، ومش بحب اسمع المجاملات، بدور على الحاجة اللي مش مظبوطة وأظبطها، واتعلمت من أخطائي في شوجر دادي في عصابة عظيمة، وأهلي أعجبوا جدًا بأدائي، وسألتهم عن الحاجة اللي مش عاجباهم وأنا راضية عن نفسي في الفيلم".

اقرأ أيضا..